Пара үстел теннисіндегі жетістік: Алтынай Ержанқызы халықаралық турнирде күміс медаль жеңіп алды

Испанияның Коста-Брава қаласында пара үстел теннисінен өткен ITTF World Para Future Costa Brava 2025 халықаралық турнирі өз мәресіне жетті. Дүбірлі додада 29 елден 164 спортшы бақ сынап, мықтылар анықталды.

Қазақстан намысын қорғаған астаналық спортшы Алтынай Ержанқызы аралас жұптық (XD20) санатында тамаша өнер көрсетіп, күміс жүлдеге қол жеткізді.

"Бұл турнир мен үшін үлкен тәжірибе болды. Әрбір ойын – өз алдына бір сынақ, бірақ мен бар күшімді салып, елімнің намысын абыроймен қорғауға тырыстым. Қасымдағы серіктесіммен жақсы үйлесім тауып, жоғары нәтиже көрсете алдық. Әрине, алтын жүлдеге бір қадам жетпей қалғанымыз өкінішті, бірақ бұл – жаңа белестерге ұмтылуға үлкен мотивация.

Жеңісіме қолдау білдірген бапкерлеріме, жанкүйерлеріме, отбасыма алғыс айтамын. Бұл – мені қолдаған барша жанның ортақ жетістігі!" – дейді Алтынай Ержанқызы.