Дмитрий Попко Челленджер турниріндегі жеңісі үшін қанша сыйақы алды?

Қазақстандық теннисші Дмитрий Попко Мексиканың Морелия қаласында өткен ATP Challenger 125 турнирінде топ жарды.

Жарыс барысында Теренс Атман (АТР: 179), Адриан Маннарино (АТР: 144), Тьяго Тиранте (АТР: 111) және Уго Гренье (АТР: 182) сынды теннисшілерді жолдан тайдырған Попко финалдық кездесуде турнирдің бірінші ракеткасы аустралиялық Джеймс Даквортты 2:1 (1:6; 6:2; 6:4) есебімен жеңді.

Попко бұл жеңісі үшін 125 рейтингтік ұпай мен 28.400 доллар сыйақыға ие болды. Сонымен қатар, отандасымыз әлемдік рейтингте 175-ші сатыға жоғарылады. Ал доданың жалпы жүлде қоры 200.000 долларды құрады.

Айта кетейік, бұл 28 жасар теннисшінің мансабындағы жеңген екінші Челленджер турнирі. Бұған дейін ол 2021 жылы Португалияның Лиссабон қаласында өткен додада қарсылас шақ келтірмеген еді. Ал ITF санатында Попконың еншісінде жалпы саны 26 титул бар.