Юлия Путинцева АҚШ-тағы турнирді жеңіспен бастады

Қазақстандық теннисші Юлия Путинцева АҚШ-тың Чарльстон қаласында өтіп жатқан Credit Оne Сharleston Оpen WTA 500 турнирінің 1/8 финалына шықты.

Жарысты 1/16 финалдан бастаған Юлия Путинцева (WTA: 23) алғашқы кездесуінде қытайлық теннисші Чжан Шуайды (WTA: 176) тізе бүктірді.

Кездесу 1 сағат 29 минутқа созылды. Осы аралықта Юлия 3 эйс пен 6 брейк жасап, 2 мәрте қос қателікке бой алдырды. Нәтижесінде отандасымыз қарсыласынан 2:0 (7:6; 6:1) есебімен басым түсті.

Енді Юлия келесі кезеңде жергілікті ракетка шебері Аманда Анисимовамен (WTA: 16) ширек финал жолдамасын сарапқа салады. Бұл кездесу бүгін, 3 наурыз сағат 20:00-ге жоспарланған.

Айта кетейік, дүбірлі доданың жалпы жүлде қоры 1 064 510 долларды құрайды.