Билли Джин Кинг кубогы: Теннисшілеріміз Аустралиядан басым түсті

Теннистен Қазақстан әйелдер құрамасы Билли Джин Кинг кубогына іріктеу кезеңі аясынлағы алғашқы матчта Аустралия құрамасын тізе бүктірді.

D тобында сынға түсіп жатқан қазақстандық ракетка шеберлері Аустралияның Брисбен қаласында өткен кездесуде жергілікті теннисшілерді 2:1 есебімен жеңді.

Ел құрамасына алғашқы жеңісті Юлия Путинцева (WTA: 23) сыйлады. Путинцева 2 сағат 15 минутқа созылған кездесуде Майя Джойнттен (WTA: 78) 2:0 (6:2; 6:1) есебімен басым түсті.

Путинцева бастаған жеңісті жолды еліміздің нөмір бірінші ракеткасы Елена Рыбакина (WTA: 10) жалғастырды. Кимберли Биррелмен (WTA: 61) кортқа шыққан Рыбакина 1 сағат 28 минутта қарсыласын 2:0 (6:3; 7:6) есебімен сан соқтырды.

Жұптық сында ел намысын қорғаған Жібек Құламбаева мен Анна Данилина өкінішке орай, Сторм Хантер/Эллен Перес ұжымына 0:2 (3:6; 4;6) нәтижесімен есе жіберді.

Осылайша Қазақстан әйелдер құрамасы Аустралияға қарсы текетіресте 2:1 есебімен жеңіске қол жеткізді.

Енді отандастарымыз ертең, 11 сәуір күні Колумбия теннисшілерімен шеберлік байқасады.

Айта кетейік, турнирдегі алты іріктеу тобынан бірінші орынмен шыққан алты бірдей ұжым әлем чемпионатының финалдық кезеңіне жолдама алады. Әр топта 2-3 орын алған құрамалар аймақтық топтық додалардың үздік командаларымен бірге плей-офф кезеңінде бақ сынайды.