Қазақстанның бірінші ракеткасы Испаниядағы турнирдің үшінші кезеңіне өтті

Қазақстанның бірінші ракеткасы Александр Бублик Испания астанасы Мадрид қаласында өтіп жатқан Mutua Madrid Open ATP Masters 1000 турнирінің 1/16 финалына шықты, деп хабарлайды Sport12.kz.

Бублик (ATP: 75) жарыстың екінші айнаоымында аустралиялық теннисші Алексей Попыринді (ATP: 26) тізе бүктірді.

Грунт кордында қос теннисші арасындағы кездесу 1 сағат 52 минутқа созылды. Осы уақыт ішінде Бублик 10 эйс пен 2 брейк жасап, 5 мәрте қос қателікке жол берді. Нәтижесінде отандасымыз қарсыласынан 2:0 (6:4; 7:6) есебімен басым түсті.

Енді Бублик 1/16 финалда Гаэль Монфис (АТР: 42) – Андрей Рублёв (ATP: 8) текетіресінің жеңімпазымен шеберлік байқасады.

Айта кетейік, дүбірлі доданың жалпы жүлде қоры 8 055 385 долларды құрайды. Ал Бублик үшінші айналымға іркілмей өткені үшін 50 рейтингтік ұпай мен 52 925 еуро сыйақыға ие болды.