Александр Бублик Италиядағы турнирде финал жолдамасына таласады

Қазақстанның бірінші ракеткасы Александр Бублик Италияның Турин қаласында өтіп жатқан Piemonte Open Intesa Sanpaolo ATP Challenger 175 турнирінің жартылай финалына шықты, деп хабарлайды Sport12.kz.

Жарыстың үшінші айналымында Бублик (АТР: 76) аргентиналық Томас Мартин Этчеверридің (АТР: 51) осал тұсын тапты.

Грунт төсенішіндегі кортта өткен кездесу 2 сағат 3 минутқа созылды. Осы уақыт ішінде Бублик 11 эйс пен 4 брейк жасап, 6 мәрте қос қателікке жол берді. Нәтижесінде отандасымыз қарсыласынан 2:1 (6:2; 3:6; 7:5) есебімен басым түсті.

Енді еліміздің үздік теннисшісі финал жолдамасын Германия өкілі Даниэль Альтмайермен (АТР: 71) сарапқа салады.

Айта кетейік, 18 мамырға дейін жалғасатын дүбірлі доданың жалпы жүлде қоры 227 270 еуроны құрайды.