Елена Рыбакина Франциядағы турнирдің жартылай финалына шықты

Қазақстанның бірінші ракеткасы Елена Рыбакина Францияның Страсбург қаласында өтіп жатқан Internationaux de Strasbourg WTA 500 турнирінің жартылай финалына жолдама алды, деп хабарлайды Sport12.kz.

Жарыстың ширек финалында Рыбакина (WTA: 12) польшалық Магда Линетті (WTA: 33) тізе бүктірді.

Грунт төсенішіндегі кортта өткен кездесу 1 сағат 41 минутқа созылды. Осы уақыт ішінде Рыбакина 7 эйс пен 2 брейк жасап, 1 мәрте қос қателікке жол берді. Нәтижесінде отандасымыз қарсыласынан 2:0 (7:5; 6:3) есебімен басым түсті.

Енді Рыбакина келесі кезеңде бразилиялық Беатрис Хаддад Майя (WTA: 23) мен америкалық Эмма Наваро (WTA: 9) арасында өтетін матчтың жеңімпазымен финал жолдамасын сарапқа салады.

Айта кетейік, дүбірлі доданың жалпы жүлде қоры 1 064 510 долларды құрайды. Ал Елена жартылай финалға сүрінбей жеткені үшін 195 рейтингтік ұпай мен 51 305 еуро сыйақыға ие болды.