Универсиада-2025: Мәнерлеп сырғанаудан София Самоделькина қола жүлде иегері атанды

Италияның Турин қаласында өтіп жатқан XXXII қысқы универсиада ойындарында мәнерлеп сырғанаудан бәсеке өтті.

Қазақстан атынан сынға түскен жалғыз спортшы София Самоделькина, еркін бағдарламада 190.96 ұпай жинап, Универсиада ойындарының қола жүлдегері атанды.

Бұл мәнерлеп сырғанаудан қысқы Универсиада тарихындағы екінші медаль. Бұған дейін 2019 жылы Елизабет Тұрсынбаева күміс жүлдені алған.

Ал ерлер сайысында Михаил Шайдоров екінші қысқы Универсиадасында да 4-орынға тұрақтап, жүлдеге сәл ғана жетпей қалды.

Еске сала кетейік, Қазақстан құрамасы жалпыкомандалық есепте 6 орында келеді. Ел құрамасының қоржынында 3 алтын, 4 күміс және 4 қола медаль бар.