Диас Сейітқалиев грек-рим күресінен әлем чемпионатында күміс жүлдегер атанды

Қазақстандық балуан Диас Сейітқалиев (82 келі) грек-рим күресінен Болгарияның Самоков қаласында өтіп жатқан 20 жасқа дейінгілер арасында әлем чемпионатында күміс медаль алды, деп хабарлайды Sport12.kz.

Отандасымыз финалда бейтарап құрама атынан сынға түскен ресейлік Михаил Шкаринге 1:4 есебімен есе жіберді. Осылайша әзірге грек-рим күресінен ел құрамасы қоржынына бір медаль түсті. 

Енді бүгін, 23 тамызда Арсен Жұма (55 келі) қола жүлде үшін күреседі.

Әлем чемпионатында грек-рим күресінен бапкерлер Диас Сейітқалиев, Арсен Жұмадан өзге Саламат Мұратұлы (60 келі), Дамир Ибрашов (63 келі), Әлібек Тұрлығазы (67 келі), Юсуф Ашрапов (72 келі), Ақжан Ықыласов (77 келі), Темірлан Тұрдақын (87 келі), Нұрасыл Аманалы (97 келі), Қуаныш Амангелді (130 келі) сынды спортшыларға сенім білдірді.

Дүбірлі додада әлем чемпионатында еркін күрестен Қазақстан құрамасы жалпы командалық есепте екінші орынға табан тіреп, 1 алтын, 1 күміс, 3 қола медаль алды.

Ел құрамасынан Едіге Қасымбек (125 келі) чемпион атанса, Камиль Куруглиев (92 келі) күміске қол жеткізді. Ал Нұрданат Айтанов (57 келі), Досжан Кұлғайып (74 келі) және Самир Дурсунов (97 келі) үздік үштікті түйіндеді.

Біздің серіктес: 200 000 фрибетті ұтысқа саламыз – арнаға жазыл және батырманы бас