Қазақстандық балуандар 10 медаль алып қайтты

Венгрия астанасы Будапешт қаласында күрес түрлерінен төртінші рейтингтік турнир мәресіне жетті. Қазақстандық балуандар 2 алтын, 2 күміс, 6 қола медаль алды, деп хабарлайды ҚазАқпарат тілшісі.

13-16 шілде аралығында грек-рим, еркін және әйелдер күресінен төртінші рейтингтік турнир өткізілді.

Жарыс барысында грек-рим күресінің шеберлері 1 алтын, 1 қола, әйелдер күресінен қазақстандық балуандар 1 алтын алды.

Ал еркін күресте қоржынға 2 күміс, 5 қола медаль түсті.

«Жылына төрт рейтингілік турнир бекітілген. Мұндай жарыстар Хорватия, Египет, Қырғызстан, Венгрияда өткізілді. Балуандар рейтингілік турнирлерде ұпай жинайды. Нәтижесінде қыркүйек айында Сербияда болатын әлем чемпионатында көп ұпай жинаған балуандар жартылай финал немесе финалға дейін бір-бірімен кездеспейді», - деді Қазақстан Күрес федерациясы баспасөз қызметінің жетекшісі Аспандияр Есенжолов.