Жәмила Бақбергенова: Әр белдесуге тактика құрамыз

Аммандағы (Иордания) Азия чемпионатында жеңімпаз атанған Жәмила Бақбергенова жарыстан соң өз пікірін білдірді:

«Команданың атынан маған алтын алу керек болды. Аллаға шүкір, чемпиондық бұйырды. Төртінші жыл қатарынан Азия чепионы атандым.

Ең қиын белдесу — жапон қызымен кездесу деп айта аламын, өйткені осыған дейін бұл спортшыға бес рет жеңіліп, міне бүгін екінші рет жеңдім.

Әр белдесуге жеке бапкерім Нұрсұлтан Теміров қалай күресетінімді, толық тактикамды қойып береді. Соны соңына дейін ұстанып, шыдап шықсам, жеңіске жетемін. Жапон қызымен белдесуде яғында кілем сыртына шығарғанда ұпай бермеді, екінші рет күшке салып шығаруға тырыстым, сол кезде іске асты. 

Маған қолдау білдірген барша халқыма алғыс білдіремін! Салмақ ауыстыру әзірше жоспарда жоқ, себебі менің бойым мен дене бітімім 76 келіге сәйкес келмей жатыр».