Азия чемпионаты: Рахат Қалжан қола жүлде үшін күреседі

Еркін күрестен қазақстандық балуан Рахат Қалжан Иорданияның Амман қаласында өтіп жатқан Азия чемпионатының финалына шыға алмады.

57 келі салмақ дәрежесінде өз бағын сынап көрген отандасымыз жарыстың жартылай финалында ирандық Милад Джахангир Вализадеге 0:3 есебімен жол берді.

Бұған дейін Рахат доданың іріктеуінде Оңтүстік Корея өкілі Ан Джон Вуды жеңсе, ширек финалда Париж Олимпиадасының қола жүлдегері өзбекстандық Гуломжон Абдуллаевтан басым түсті.

Енді отандасымыз сары құрлық додасының қола жүлдесі үшін күреседі.

Айта кетейік, Рахат Қалжан – Азия чемпионатының екі дүркін жүлдегері. 2022 жылы Моңғолия астанасы Ұлан-Батырда өткен байрақты бәсекеде күміспен күптелсе, 2023 жылы елордада қола жүлдеге ие болды.