Күрес түрлерінен Қазақстан кубогы өтеді

2025 жылдың 24-30 мамыры аралығында Астана қаласында грек-рим, еркін және әйелдер күресінен Қазақстан Республикасының Кубогы өтеді, деп хабарлайды Sport12.kz.

Жарыс ересектер арасында ұйымдастырылады. Биылғы турнирге еліміздің барлық өңірі мен республикалық маңызы бар қалалардан келген 1000-ға жуық балуан қатысады. Сонымен қатар, халықаралық деңгейде ел намысын қорғап жүрген белгілі спортшылар да боз кілемге шығады. Бұл турнир ұлттық құраманы алдағы әлем чемпионатына жасақтау мақсатында өтетіндіктен, балуандар үшін аса маңызды іріктеу турнирі болмақ.

Жарыс бағдарламасына сәйкес, алғаш болып еркін күрестен жеңімпаздар анықталады. Одан кейін әйелдер күресінде жүлделер сарапқа салынады. Бір аптаға созылатын бәсеке грек-рим күресінің белдесулерімен қорытындыланады.

Тартысты турнир Qazaqstan жеңіл атлетикалық спорт кешенінде өтеді.