14.04.2023
Күрестен Азия чемпионаты: Төрт балуанымыз финалға шықты
Азамат Дәулетбеков
Күрес түрлерінен Астана қаласында өтіп жатқан Азия чемпионатында төрт бірдей балуанымыз финалға жолдама алды.
74 келі салмақта өнер көрсетіп жатқан Дархан Есенғали Бахрейн елінің балуаны Магомедрасул Аслуевті 2:1 есебімен жеңіп, ақтық бәсекеге шықты.
86 келі салмақта бақ сынаған Азамат Дәулетбеков жартылай финалда өзбекстандық Бобур Исломовты айқын басымдықпен (10:0) жеңді.
92 келі салмақ дәрежесінде белдескен Ризабек Айтмұхан бахрейн балуаны Магомед Шариповты 6:1 есебімен жеңіп, Азия Чемпионатының финалына шықты.
Ал 125 келі салмақ дәрежесіндегі 1/2 финалдық белдесуде Юсуп Батырмурзаев өзбекстандық Сардорбек Холматовты таза жеңді.
Финалдық белдесулер кешкі сағат 18:00-де басталады.
