Сәкен Бибосынов әлемдік рейтингте көш бастады

Қазақстандық былғары қолғап шебері Сәкен Бибосынов аса жеңіл салмақ (51 келіге дейін) дәрежесіндегі жаңартылған BoxRec рейтингінде бірінші орынға көтерілді, деп хабарлайды Sport12.kz.

Бұл жетістікке Сәкен Ресейдің Хабаровск қаласында 15-19 сәуір аралығында өткен Константин Коротковты еске алу турнирінде топ жарғаннан кейін жетті.

Аталған турнирде 54 келі салмақ дәрежесінде бақ сынаған Бибосынов қарсылас шақ келтірмеген еді. Жарыс барысында отандасымыз алдымен ресейлік Курбан Байрамбековті (5:0), кейін өзбекстандық Фариезбек Дусматовты (5:0) айқын басымдықпен ұтты. Ал финалда Ресей өкілі Денис Пальшинді 5:0 есебімен сенімді жеңді.

BoxRec нұсқасы бойынша Сәкен өзге салмақта чемпион атанғанына қарамастан, өзінің негізгі салмағында көш бастап тұр.

Айта кетейік, Сәкен Бибосынов – бокстан Әлем чемпионы (2021), Токио Олимпиадасының қола жүлдегері (2021).