Өзбекстан мен Ресей арасында жолдастық ойын өткізу идеясы ұсынылды

Ресей футбол одағының құрметті президенті Вячеслав Колосков Өзбекстан ұлттық құрамасы 2026 жылғы әлем чемпионатына жолдама алғаннан кейін, ресейлік командаға өзбекстандықтармен жолдастық кездесу өткізуге ұсыныс білдірді, деп хабарлайды Sport12.kz

— Ресей құрамасына Өзбекстанмен ойнау жаман болмас еді. Өзбекстан құрамасының соңғы жетістіктері аясында мұндай матч біздің құрама үшін жақсы сынақ болар еді. Ресей футбол одағы мұндай ойынды ұйымдастыруды қолға ала алады. Бұл – жаман идея емес, – деді Колосков.

5 маусым күні Өзбекстан тарихта алғаш рет футболдан әлем чемпионатына шықты. Олар Азиядағы 1-іріктеу тобының матчында БАӘ-мен тең ойнап (0:0), турнир аяқталмай тұрып-ақ өз тобында кемінде екінші орынды иеленіп, тікелей жолдама алды.

Айта кетейік, Ресей мен Өзбекстан құрамалары бұған дейін 2022 жылдың қарашасында жолдастық кездесуде ойнап, матч 0:0 есебімен аяқталған болатын.