«Қайрат» қатарына бразилиялық шабуылшыны қосуы мүмкін

Словениялық «Целе» футбол клубының бразилиялық шабуылшысы Эдмилсон «Қайратқа» ауысуы мүмкін деп хабарлайды, Sport12.kz.

Meta-ratings.kz порталының мәліметінше, қазақстандық клуб 28 жастағы ойыншыны қатарына еркін агент ретінде қосады.

Эдмилсон «Целе» сапында екі маусым өткізіп, Словения бірінші лигасы мен Ел кубогында чемпион атанды. Осы аралықта ол командада 73 ойын өткізіп, 19 гол соғып, 8 нәтижелі пас берді.

Осыған дейін алматылық ұжымның бразилиялық форварды Жоао Паулоға сәтті ота жасалған болатын.

Айта кетейік, Қазақстан Премьер-лигасының 12 ойынында 26 ұпай жинаған «Қайрат» турнир кестесінде екінші орында келеді. Рафаэль Уразбахтин шәкірттері осы жазда өткен жылғы ел чемпионы ретінде Чемпиондар лигасының іріктеу турнирінде бақ сынайды.