3 сағат бұрын
Қазақстандық клубтардың футболдан Конференция лигасындағы ықтимал қарсыластары анықталды
Фото: «Астана» футбол клубы
Қазақстандық клубтардың футболдан Конференция лигасындағы ықтимал қарсыластары анықталды, деп хабарлайды Sport12.kz.
«Астана» футбол клубының Конференция лигасындағы жорығын бірден екінші іріктеу кезеңінен бастап, Молдованың «Зимбру» командасымен шеберлік байқасады.
Командалар 24 және 31 шілде күндері үшінші іріктеу кезеңінің жолдамасын сарапқа салады.
«Ордабасы» Конференция лигасы екінші іріктеу кезеңіне шыққан жағдайда дәл сол күндері Кипрдің «Омония» клубымен ойнайды. Оларға алғашқы іріктеу кезеңінде Грузияның «Торпедо» (Кутаиси) командасы қарсылас атанған болатын. Ойындар 10 және 17 шілдеге жоспарланған.
Алматылық «Қайрат» Конференция лигасына түскен жағдайда екінші іріктеу кезеңінде ФКСБ (Румыния) бен «Интер д’Эскальдес» (Андорра) жұбының жеңімпазымен ойнайды.
Қазірге дейін алматылық «Қайраттың» Чемпиондар лигасының бірінші және екінші іріктеу кезеңіндегі қарсыластары белгілі болып отыр.
Олар алдымен Словенияның «Олимпия» командасымен кездессе, келесі кезеңге шыққан жағдайда КуПС (Финляндия) мен «Милсами» (Молдова) жұбының жеңімпазымен кездеседі.
Ал «Ақтөбе» Конференция лигасына түскен жағдайда Чехияның «Спарта» клубымен ойнайды.
Оған дейін қазақстандық клуб Еуропа лигасы бірінші іріктеу кезеңінде Польшаның «Легия» (Варшава) клубымен кім мықтыны анықтайды. Ойындар 10 және 17 шілдеге жоспарланған.
Бұл жұпта жеңімпаз болған клуб екінші іріктеу кезеңінде Чехияның «Баник» клубымен шеберлік байқасады. Бірінші ойын 24 шілдеге, жауапты кездесу 31 шілдеге жоспарланған.
