Қазақстандық маунтинбайкер Азия чемпионатында күміс алды

Қазақстандық маунтинбайкер Денис Сергиенко Қытайдың Цзуньи қаласында өтіп жатқан Азия чемпионатының күміс жүлдегері атанды, деп хабарлайды Sport12.kz. 

Олимпиада бағдарламасына енетін кросс-кантри бәсекесінде сынға түскен отандасымыз мәре сызығын екінші болып қиды. 

Аталған жарыста қалған жүлделі бірінші және үшінші орындарды Қытай спортшылары иеленді.

Бұл сары құрлық додасындағы Қазақстан қоржынына түскен екінші жүлде. Осыған дейін эстафетада бақ сынаған ел құрамасы (Денис Сергиенко, Богдан Лухманов, Алексей Фефелов, Виолетта Казакова, Юлия Ли, Алина Карасева) екінші орыннан көрінген еді.

Айта кетейік, дүбірлі додада 15 елдің атынан 160 велошабандоз бақ сынап жатыр.