Қазақ спортшыларының өткен аптадағы жеңістері

Каратэ: Мажарстан астанасы Будапештте мәресіне жеткен WKF каратэден әлем чемпионатында Мөлдір Жаңбырбай (50 кг) топ жарып, спорттың осы түрінен ересектер арасында әлем чемпионы атанған тұңғыш қазақ спортшысы атанды. Сонымен қатар Қайсар Алпысбай (60 кг) әлем біріншілігінің – күміс, Дидар Әмірәлі қола жүлдесіне ие болды.

Грек-рим: Сұлтан Әсетұлы Албания астанасы Тиранада өтіп жатқан 23 жасқа дейінгі балуандар арасындағы әлем біріншілігінің жеңімпазы атанды. Сұлтан – 23 жасқа дейінгі санатта əлем чемпионаты атанған тұңғыш қазақ палуаны. Әйелдер күресінде Алтын Шағаева (53 кг) мен Ирина Кузнецова (62 кг) қола жүлдеге қол жеткізді.

Шорт-трек. Канаданың Монреаль қаласында жалауы желбіреген шорт-тректен Әлем кубогінің алғашқы кезеңінде Қазақстан құрамасының спортшылары 5 000 метрге эстафета жарысында қола жүлдегер атанды. Ел құрамасынан жарыс жолына Әділ Ғалиахметов, Мерсайд Жақсыбаев, Еркебұлан Шамұханов, Денис Никиша шықты.

Армрестлинг: Эр-Риядта (Сауд Арабиясы) өткен Дүниежүзілік жауынгерлік өнер ойындарында Қазақстан құрамасы армрестлингтен 7 алтын, 3 күміс және 8 қола медаль олжалап, жалпыкомандалық есепте топ жарды.

Дзюдо: Камила Берліқаш Абу-Дабидегі «Grand Slam» жарысында күміс жүлдеге ие болды. Ол финалда португалиялық Рушель Нуньеспен күресті.