Астанада жүгіруден бесінші рет Astana Half Marathon өтеді

7 маусым күні Астанада қаладағы ең ірі жүгіріс жарыстарының бірі — Astana Half Marathon бесінші мәрте ұйымдастырылады, деп хабарлайды Sport12.kz.

Іс-шараға әлемнің 30-дан астам елінен 7000-ға жуық қатысушы жиналады.

Жарыстың старт және финиш аймағы Тәуелсіздік алаңында, «Қазақ елі» монументі жанында орналасады. Маршрут елорданың негізгі көрікті және урбанистік нысандары арқылы өтеді. Ұйымдастырушылардың айтуынша, жарысқа қатысушылармен қатар қала қонақтары мен жанкүйерлер үшін де арнайы старт-қалашық ашылады.

Корпоративтік қор «Смелость быть первым» өкілдерінің мәліметінше, марафон бес жыл бұрын Астанада бұқаралық спортты дамыту және жүгіру мәдениетін насихаттау мақсатында басталған. Уақыт өте келе ол халықаралық деңгейдегі маңызды спорттық шаралардың біріне айналып, шетелдік қатысушыларды да тарта бастады.

Биылғы бағдарламада төрт қашықтық қарастырылған: 21,1 км жартылай марафон, 10 км жүгіру, 10 км скандинавиялық жүріс және «Экиден» командалық эстафетасы. Қатысушылардың нәтижелері Қазақстан жеңіл атлетика федерациясының ресми есебіне енеді, сондай-ақ жартылай марафон бойынша ел чемпионаты өтеді.

Жарыс AIMS халықаралық қауымдастығына кіреді және World Athletics талаптарына сай сертификатталған. Ұйымдастырушылар бұл шараны Қазақстандағы спорттық туризмді дамытуға бағытталған маңызды жоба ретінде қарастырады.

Іс-шара бағдарламасы:

• 05:00 — старт қалашығының ашылуы
• 05:30 — қыздыру жаттығулары
• 06:00 — 21,1 км және эстафета старты
• 06:50 — 10 км және скандинавиялық жүріс старты
• 08:50 — марапаттау
• 11:00 — ресми жабылу

Astana Half Marathon биыл да елорданың басты спорттық оқиғаларының бірі болмақ.

Біздің серіктес: Olimpbet қосымшасын пайдалан