Бокстан Азия чемпионатындағы көрсеткішімізге баға берілді

Қазақстан бокс федерациясының вице-президенті Дархан Қызайбаев Ташкентте (Өзбекстан) өткен 15 және 17 жасқа дейінгі боксшылар арасындағы Азия чемпионатында Қазақстан жасөспірімдер құрамаларының өнер көрсетуіне бағасын берді, деп хабарлайды Sport12.kz

«Қазір нәтижелер бізді қуантатынын сенімді түрде айта аламыз. Жалпыкомандалық есепте біз екінші орын алдық. Тек Өзбекстан құрамасына жол бердік және 15 алтын медаль жеңіп алдық.

Біздің боксшыларымызға, өсіп келе жатқан жас спортшыларға үлкен алғыс айтамын. Мұнда ұлттық құраманың бас бапкері Нұржан Насанов, Қайрат Сәтжанов және Мұхтархан Ділдәбеков бар. Олар жастарды жіті бақылап отыр. Бүгін чемпион атанған немесе сәл ғана жетпей қалған осы ұл-қыздардан болашақта мықты спортшылар өсіп шығады деп сенеміз. Олар алдағы уақытта Қазақстанның туын Олимпиада ойындарында талай мәрте көтереді деп ойлаймын.

Қазіргі резервтің жағдайы жаман емес. Біз жаңа реформалар жүргізіп жатырмыз: психологтарды тартамыз, қосымша медициналық бағдарламаларды енгіземіз және жалпы дене дайындығын күшейтеміз. Нәтижелері де көрініп жатыр — ұлдар да, қыздар да жақсы нәтиже көрсетуде.

Барлық алтын, күміс және қола медаль иелерін құттықтаймын. Олар әлі жас спортшылар. Олардың болашағы алда. Алда көптеген ірі жарыстар бар. Сондықтан тек сәттілік тілеймін.

Біз қолдауды арттырып, бұл спорт түрін дамытуды жалғастырамыз, жастарға ерекше көңіл бөлеміз. Бұл тек бастамасы, алдағы уақытта бұдан да жақсы нәтижелер болады деп сенемін», — деді Қызайбаев.

Ташкенттегі Азия чемпионатында Қазақстан жалпы медальдық есепте екінші орын алды. Бірінші орынды Өзбекстан иеленді. World Boxing ұйымы аясындағы турнирде қазақстандық боксшылар 15 алтын, 11 күміс және 14 қола медаль жеңіп алды.

Біздің серіктес: Olimpbet қосымшасын пайдалан