Үш дүркін ел чемпионы Ресейдің RCC HARD лигасында дебют жасайды

Қазақстандық боксшы, әуесқой бокстан үш дүркін ел чемпионы Әділет Құрметовтің Ресейдің RCC HARD жұдырықтасу лигасындағы алғашқы жекпе-жегінің өтетін күні белгілі болды.

Спортшы қыркүйек айының басында Ресейдің Челябі қаласында өтетін турнирде дебют жасайды. Қарсыласының есімі әзірге жарияланған жоқ. Қазір Құрметов алдағы жекпе-жекке дайындықты бастап кеткен.

Еске салайық, биыл мамыр айында Әділет Құрметов жеңіл салмақта өткен One Round нокаут-шоуының жеңімпазы атанып, турнирде үш қарсыласын мерзімінен бұрын жеңген болатын. Осы жетістігінің арқасында ол RCC HARD лигасымен келісімшартқа қол қойды.

Құрметов әуесқой бокстан Қазақстанның үш дүркін чемпионы. Сондай-ақ 2021–2024 жылдары кәсіпқой рингте өнер көрсетіп, үш жекпе-жегінің барлығында жеңіске жеткен.

Біздің серіктес: Sport12kz