Қазақ боксшысы Ресейдің еңбек сіңірген спорт шебері атанды

Ресей құрамасының боксшысы Салтанат Меденоваға «Ресейдің еңбек сіңірген спорт шебері» атағы берілді.

Салтанат Меденова бұл туралы әлеуметтік желідегі парақшасында хабарлады. Боксшы марапатқа қатысты Ресей Федерациясы Спорт министрлігінің куәлігін де жариялаған. Құжатта атақ 2025 жылғы 24 қазандағы бұйрықпен берілгені көрсетілген.

«Ресейдің еңбек сіңірген спорт шебері» және «Ресейдің еңбек сіңірген жаттықтырушысы» деген атақтарды ресми түрде алдық. Осындай сәттерде осы уақытқа дейін қандай үлкен жолдан өткенімізді ерекше сезінеді екенсің. Кеше ғана осыны армандап, қол жетпестей көрінген мақсаттар қойып жүргендей едік», – деп жазды боксшы.

Айта кетейік, Салтанат Меденова Омбыда туған – ұлты қазақ. Ол Орта жүз Қыпшақ руынан шыққан. Спортшы 2025 жылы 81 келіге дейінгі салмақта IBA әлем чемпионатында алтын медаль жеңіп алған.

Биыл сәуірде Меденова Ресейдің «Отан алдындағы еңбегі үшін» II дәрежелі орденімен марапатталды.

Сонымен қатар оның жеке бапкері Сергей Земцов «Ресейдің еңбек сіңірген жаттықтырушысы» атағын алды. Ресей бокс федерациясы маманды Меденованы әлем чемпионы деңгейіне дайындағаны үшін осы марапатқа лайық деп таныған.

Біздің серіктес: Sport12kz