Хамза Шираз рингке қашан оралатынын айтты

WBO нұсқасы бойынша екінші орта салмақтағы әлем чемпионы Хамза Шираз келесі жекпе-жегін қашан өткізуді жоспарлап отырғанын айтты, деп хабарлайды Sport12.kz.

Британдық боксшы қолына жасалған отадан кейін қалпына келіп жатыр. Журналистермен әңгіме барысында ол рингке желтоқсан айында оралуды жоспарлап отырғанын мәлімдеді.

– Рингке қашан оралуды жоспарлап отырсың?

– Жақын арада деп үміттенемін. Қолымдағы отадан кейін қалпына келіп жатырмын. Жақында ораламын деп ойлаймын. Шамамен желтоқсанда, – деді Шираз.

Алайда боксшы бұл жекпе-жектің қазақстандық Жәнібек Әлімханұлымен міндетті титул қорғауы болатынын нақтылаған жоқ.

Еске салайық, тамыз айында WBO Хамза Ширазға Жәнібек Әлімханұлымен жекпе-жек өткізіп, титулын қорғауды міндеттеген еді. Бұл шешім британдық чемпионның наразылығын тудырды.

Боксшылардың өкілдері белгіленген мерзімде жекпе-жек өткізу жөнінде келісімге келе алмады. Енді кездесудің тағдырын промоутерлік сауда шешеді. Ол 16 қыркүйекке жоспарланған.

Біздің серіктес: Sport12kz