Астанада 200-ден астам жас боксшы чемпиондық атаққа таласуда

Астанадағы «Аспан» спорт кешенінде жастар мен жасөспірімдер арасында бокстан елорда чемпионаты өтуде. Байрақты бәсекенің негізгі мақсаты – болашақта Астана құрамасының сапын толықтыратын үздік спортшыларды анықтап, республикалық жарыстарға іріктеу.

8–12 қыркүйек аралығында 2009–2010 жылдары туған жастар арасында қала біріншілігі ұйымдастырылды. Додаға 140-қа жуық жас боксшы қатысып, ұлдар мен қыздар бірнеше салмақта чемпиондық атақты сарапқа салды.

Ұлдар арасындағы жеңімпаздар қатарында Бекзат Бектемір (48 кг), Олжас Нұрланұлы (50 кг), Юнус Рақымжан (55 кг), Айдын Сейсенбай мен Әділет Ғалиев (60 кг), Ернұр Өнертаев (65 кг), Әлібек Дияс (70 кг), Елхан Суелхан (75 кг), Әзизжан Қанат (80 кг), Нұрдәулет Қалдар (85 кг), Сабыржан Сағым (90 кг) және Тимур Нұрымов (+90 кг) бар.

Қыздар арасында 51 келіге дейінгі салмақта Аяжан Серікбай жеңімпаз атанса, 54 келіде Гүлбану Бекмұрат, 57 келіде Асқар Нұрай, 65 келіде Айша Базарбай чемпион атанды.

Жастар арасындағы жарыс аяқталған соң спорт кешенінде кадеттер арасындағы елорда чемпионаты басталды. Оған Астанадағы спорт мектептері мен бокс клубтарының, сондай-ақ Қажымұқан Мұңайтпасов атындағы спорт мектеп-интернатының 200-ден астам тәрбиеленушісі қатысып жатыр.

Қазір жас боксшылар іріктец кезеңдерімен жартылай финалдық жекпе-жектерде бақ сынауда. 16 қыркүйекте финалдық кездесулер өтіп, жасөспірімдер арасындағы қала чемпиондары мен жүлдегерлер анықталады.

Жарыс нәтижесінде өз салмағында үздік нәтиже көрсеткен спортшылар Астана қаласының құрама командасына қабылданып, алдағы республикалық додаларда елорда намысын қорғайды.

Біздің серіктес: Sport12kz