WBO Әлімханұлы – Шираз жекпе-жегінің гонорарын жариялады

Дүниежүзілік бокс ұйымы (WBO) қазақстандық Жәнібек Әлімханұлы мен Ұлыбританиялық Хамза Шираз арасындағы титулдық жекпе-жекке қатысты промоутерлік сауданың шарттарын жариялады, деп хабарлайды Sport12.kz.

Промоутерлік саудадағы ең төменгі ұсыныс 300 мың долларды құрайды. Жүлде қорының бөлінуі жекпе-жектің қай жерде өтетініне байланысты болады.

Егер кездесу Шираздың туған елінде, тұрғылықты жерінде немесе азаматтығы бар елде, сондай-ақ бейтарап аумақта өтсе, чемпионға 75%, ал міндетті қарсыласына 25% тиеді. Ең төменгі 300 мың долларлық ұсыныс кезінде Шираз 225 мың, ал Әлімханұлы 75 мың доллар алады.

Ал жекпе-жек Әлімханұлының туған елінде, тұрғылықты жерінде немесе азаматтығы бар елде өтетін болса, Ширазға жүлде қорының 80%-ы, ал «Қазақ стиліне» 20%-ы беріледі. Бұл жағдайда ең төменгі ұсыныс бойынша чемпион 240 мың, ал қазақстандық боксшы 60 мың доллар алады.

Әлімханұлы – Шираз жекпе-жегіне арналған промоутерлік сауда 16 қыркүйекте Пуэрто-Риконың Сан-Хуан қаласындағы WBO штаб-пәтерінде өтеді. Басталуы Қазақстан уақытымен 23:00-ге жоспарланған.

Ұйым сауданы WBO-ның цифрлық платформаларында тікелей көрсететінін мәлімдеді.

Біздің серіктес: Sport12kz