«Даниярға көмектесе алмайсыз ба?»: Сатыбалдинова Елеусіновтің промоутеріне үндеу жасады

Қазақстандық кәсіпқой боксшы Аида Сатыбалдинова Олимпиада чемпионы Данияр Елеусіновтің қазіргі жағдайына қатысты пікір білдіріп, оның промоутеріне үндеу жасады.

Сатыбалдинова әлеуметтік желідегі парақшасында All Star Boxing промоутері Зия Алиевке тікелей хабарласып, Елеусіновке қажет болған жағдайда қолдау көрсетуді сұрады.

«Зия Алиев, сіз оның басынан не өтіп жатқанын көріп отырсыз ғой. Оның промоутері ретінде Даниярға көмектесе алмайсыз ба? Егер оған көмек, психологиялық қолдау немесе оңалту қажет болса, меніңше, бұған назар аударғаныңыз жөн», – деді ол.

Бұған дейін Данияр Елеусінов жол-көлік оқиғасынан кейін ішімдікке әуестігі туралы ашық айтып, бұл әдеттің 2016 жылғы Рио Олимпиадасындағы жеңісінен кейін басталғанын мәлімдеген еді. Сондай-ақ ол кәсіпқой бокстағы мансабын жалғастырып, Zuffa Boxing турнирлерінде өнер көрсету ниетін білдірді.

Олимпиада чемпионы жақында қазақстандық поп-ММА өкілі Еркебұлан Тоқтарды жекпе-жекке шақырған. Алайда Тоқтар бұл ұсыныстан бас тартып, өзін Елеусіновпен кәсіпқой бокста жұдырықтасатын деңгейде емес екенін айтқан.

Әзірге Данияр Елеусіновтің командасы оның қазіргі жағдайына қатысты ресми мәлімдеме жасаған жоқ.

Айта кетейік, Данияр Елеусінов 2016 жылғы Рио Олимпиадасында 69 келіге дейінгі салмақта чемпион атанды. Кейін кәсіпқой боксқа ауысып, халықаралық рингте өнер көрсетті.

Біздің серіктес: Sport12kz