Қазақстандық боксшы Азиадада нокдаунмен жеңіске жетті

Қазақстан құрамасының жетекші боксшыларының бірі Төрехан Сабырхан Жапонияның Аичи және Нагоя қалаларында өтіп жатқан Азиада-2026 ойындарындағы алғашқы жекпе-жегін өткізді, деп хабарлайды Sport12.kz.

70 келіге дейінгі салмақтағы 1/8 финалда қазақстандық боксшы Катар өкілі Мұхаммед Дбичимен кездесті.

Үш раунд қорытындысы бойынша төрешілердің бірауызды шешімімен Сабырхан 5:0 есебімен жеңіске жетті. Сонымен қатар екінші раундта қазақстандық боксшы қарсыласын нокдаунға түсірді.

Осылайша, Төрехан Сабырхан Азиада-2026 ойындарының ширек финалына жолдама алды. Ал Мұхаммед Дбичи медаль үшін күресін тоқтатты.

Айта кетейік, Сабырхан бірінші айналымнан босатылған болатын. Ал Дбичи 1/16 финалда вьетнамдық Дук Нгок Нгуенді жеңген еді.

Азиада-2026 ойындарында Қазақстан ерлер құрамасы бастапқыда алты салмақ дәрежесінде ұсынылған. Алайда бұған дейін 80 келіге дейінгі салмақта Сабыржан Аққалықов алғашқы жекпе-жегінде жеңіліп қалған болатын.

Біздің серіктес: Sport12kz