Сұлтан Заурбектің әлем чемпионы атағына таласатын жекпе-жегі анықталды

Екінші жеңіл салмақта өнер көрсететін австралиялық боксшы Джексон Ингленд Қазақстан өкілі Сұлтан Заурбекпен IBF нұсқасы бойынша әлем чемпионы атағына міндетті үміткер мәртебесі үшін жекпе-жекті ұйымдастырудағы қиындықтар туралы айтты, деп хабарлайды Sport12.kz.

Жекпе-жек бірнеше рет кейінге шегеріліп, ақыры 26 қыркүйекке белгіленді.

Инглендтің айтуынша, жекпе-жекті ұйымдастыру процесі бірнеше қиындыққа тап болған. Алдымен кездесуді қазан айында Қазақстанда өткізу жоспарланған. Кейін желтоқсанға шегеріліп, маусым айына қайта белгіленгенімен, бұл жоспарлар жүзеге аспаған.

Одан кейін тараптар жекпе-жекті өткізу үшін промоутерлік саудаға жүгінген. Инглендтің командасы саудада жеңіске жетіп, кездесуді Австралияда өткізу құқығын алған. Алайда Перт қаласында қолайлы күн табылмағандықтан, жекпе-жек Серферс-Парадайс қаласына ауыстырылған.

Сұлтан Заурбек пен Джексон Ингленд арасындағы жекпе-жектің жеңімпазы IBF нұсқасы бойынша екінші жеңіл салмақта әлем чемпионы атағына міндетті үміткер атанады.

Қазіргі таңда бұл салмақтағы IBF чемпиондық белбеуі мексикалық Эмануэль Наварретеге тиесілі. Оның кәсіби рекорды — 40 жеңіс, 2 жеңіліс және 1 тең нәтиже, оның 33 жекпе-жегін нокаутпен аяқтаған.

Біздің серіктес: Sport12kz