Жәнібек Әлімханұлы үшін WBO титулы жолындағы басты қауіп аталды

Қазақстандық боксшы Жәнібек Әлімханұлының бос тұрған WBO әлем чемпионы белбеуі үшін өтетін жекпе-жегіне қатысты пікір айтылды, деп хабарлайды Sport12.kz.

Жәнібек Әлімханұлы мен Дания өкілі Якоб Банк арасындағы жекпе-жек желтоқсан айында Копенгагенде өтуі мүмкін.

Жәнібектің екінші орта салмаққа ауысуы үлкен қызығушылық тудырып отыр. Орта салмақтағы үстемдігі оның жоғары деңгейін көрсеткенімен, жаңа салмақта соққы қуатын сақтай алатынын дәлелдеуі керек.

Якоб Банктің бойы мен физикалық мүмкіндіктері, сондай-ақ жеңіске деген ұмтылысы Жәнібекке қиындық тудыруы мүмкін. Дегенмен бос тұрған WBO белбеуін жеңіп алу қазақстандық боксшыға бірден екі салмақта әлем чемпионы атануға мүмкіндік береді.

Егер Жәнібек чемпиондық титулды иеленсе, ол екінші орта салмақтағы ең қауіпті әрі қарсыластары үшін қолайсыз боксшылардың біріне айналуы мүмкін. Мұндай жағдайда оның келесі жекпе-жектері міндетті қорғау аясында немесе Еуропаның үздік үміткерлеріне қарсы өтуі ықтимал.

Айта кетейік, WBO-ның екінші орта салмақтағы чемпиондық белбеуі Хамза Шираз міндетті қорғау аясында Жәнібек Әлімханұлымен жекпе-жек өткізуден бас тартқаннан кейін бос қалған.

Біздің серіктес: Sport12kz