Бек Нұрмағанбет «Канело» Альварестің бокс кешінде 17-жекпе-жегін өткізеді

Қазақстандық кәсіпқой боксшы Бек Нұрмағанбет 31 қазанда Сауд Арабиясының Эр-Рияд қаласында өтетін бокс кешінде шаршы алаңға шығады. Жеңіліс көрмеген отандасымыз кәсіби мансабындағы 17-жеңісіне қол жеткізуге талпынады, деп хабарлайды Sport12.kz.

Қазақстандық боксшының қарсыласы — мексикалық Маркос Васкес Родригес. Бек Нұрмағанбеттің еншісінде 16 жеңіс бар, оның 14-і нокаутпен аяқталған. Ал мексикалық спортшы кәсіпқой рингте 21 рет жеңіске жетіп, үш мәрте жеңіліс тапқан.

Сауд Арабиясындағы бокс кешінің басты жекпе-жегінде әлемдік бокстың жұлдызы Сауль «Канело» Альварес жеңіліс көрмеген француз Кристиан Мбиллимен кездеседі. Олар екінші орта салмақта WBC тұжырымы бойынша чемпиондық белбеу үшін жұдырықтасады.

Айта кетейік, Бек Нұрмағанбет бұған дейін де «Канело» қатысатын бокс кештерінде өнер көрсеткен. Қазақстандық боксшы Лас-Вегаста өткен осындай үш кеште жекпе-жек өткізген.

Біздің серіктес: Sport12kz