«Канело» әлемнің үздік бес боксшысын атады

Мексикалық кәсіпқой боксшы Сауль «Канело» Альварес салмақ дәрежесіне қарамастан әлемнің үздік боксшылары деп санайтын бес спортшының есімін атады.

Boxing News Online басылымының мәліметінше, мексикалық боксшы бұл тізімді DAZN Boxing арнасына берген сұхбатында жариялаған. Ол өз есімін үздік бестікке қоспаған.

Альварестің таңдауы бойынша, бірінші орында украиналық Александр Усик тұр. Екінші орынға жапониялық Наоя Иноуэ жайғасқан. Үздік бестіктің қатарында ресейлік Дмитрий Бивол, америкалық Шакур Стивенсон мен Джервонта Дэвис бар.

«Канелоның» нұсқасы бойынша, үздік боксшылар тізімі мынадай:

1. Александр Усик (Украина)
2. Наоя Иноуэ (Жапония)
3. Дмитрий Бивол (Ресей)
4. Шакур Стивенсон (АҚШ)
5. Джервонта «Танк» Дэвис (АҚШ)

Айта кетейік, Дмитрий Бивол 2022 жылы Сауль Альваресті жеңген. Қазіргі уақытта ол жартылай ауыр салмақтағы төрт негізгі чемпиондық белбеудің үшеуіне ие.

Ал «Канело» 31 қазанда Сауд Арабиясының Эр-Рияд қаласында Кристиан Мбиллимен жұдырықтасады. Бұл жекпе-жекте WBC нұсқасы бойынша екінші орта салмақтағы әлем чемпионы атағы сарапқа салынады.

Мексикалық боксшы соңғы рет 2025 жылғы қыркүйекте рингке шығып, америкалық Теренс Кроуфордтан төрешілер шешімімен жеңілген еді.

Біздің серіктес: Sport12kz