Жәнібек Әлімханұлы 2027 жылы әлем чемпионы атағы үшін жұдырықтасады

Қазақстандық боксшы Жәнібек Әлімханұлы WBO тұжырымы бойынша екінші орта салмақтағы әлем чемпионы атағы үшін даниялық Якоб Банкпен (20-0, 11 KO) жұдырықтасады.

Primetime Boxing промоутерлік компаниясының мәліметінше, жекпе-жек 2027 жылғы 23 қаңтарда Данияның Хорсенс қаласында өтеді.

Бұған дейін осы салмақтағы чемпиондық белбеу британдық Хамза Ширазға тиесілі болған. Алайда ол Әлімханұлымен міндетті титул қорғау жекпе-жегінен бас тартып, белбеуді босатты. Осыдан кейін WBO қазақстандық боксшы мен Якоб Банкке чемпиондық атақты сарапқа салуға рұқсат берді. Екі тарап келіссөз барысында ортақ мәмілеге келгендіктен, промоутерлік сауда-саттық өткізілмейтін болды.

Жәнібек Әлімханұлы кәсіпқой рингте әлі жеңіліп көрген жоқ. Оның қарсыласы Якоб Банк те 20 жекпе-жектің барлығында жеңіске жеткен. Алдағы кездесуде қазақстандық боксшы жаңа салмақта әлем чемпионы атануға мүмкіндік алады.

Біздің серіктес: Sport12kz