«Ордабасы» Тео Бонгонганы алудан бас тартты

Шымкенттік «Ордабасы» клубының президенті Дархан Қызайбаев «Спартак» жартылай қорғаушысы Тео Бонгонганың мүмкін трансфері туралы пікір білдірді.

Оның айтуынша, клуб бұған дейін конголық футболшыға қызығушылық танытқанымен, қазір ол ойыншы трансферлік жоспарға кірмейді.

— Біз расында Тео Бонгонганы қарастырдық. Ол — өте жоғары деңгейлі футболшы, деңгейі Қазақстан Премьер-лигасынан жоғары. Бірақ қазіргі таңда ол біздің қызығушылық аясында жоқ. Қыста төрт ойыншы алдық, ал жазда екі-үш нүктелік күшейту жасауды жоспарлап отырмыз. Сондықтан бұл жазда Бонгонга «Ордабасыға» келмейді, — деді Қызайбаев.

Айта кетейік, 30 жастағы футболшы 2023 жылдан бері мәскеулік «Спартак» сапында ойнайды. Осы уақыт ішінде ол 75 матч өткізіп, 16 гол соғып, 6 нәтижелі пас берген. Оның трансферлік құны шамамен 4 миллион еуроға бағаланады.

Қазіргі таңда «Ордабасы» жеті турдан кейін 15 ұпай жинап, турнирлік кестеде екінші орында тұр. Келесі матчта команда 3 мамыр күні өз алаңында «Ақтөбені» қабылдайды.

Біздің серіктес: Olimpbet қосымшасын пайдалан