Неймар ӘЧ-2026 құрамасына қайта оралды

Бразилия құрамасының бас бапкері Карло Анчелотти шабуылшы Неймарды 2026 жылғы әлем чемпионатына қатысатын құрамға қосты.

Ауыр жарақаты мен ұлттық құрамадағы ұзақ үзіліске қарамастан, тәжірибелі футболшы АҚШ, Канада және Мексикада өтетін әлем біріншілігіне аттанады.

2026 жылғы әлем чемпионаты 11 маусым мен 19 шілде аралығында өтеді. Тарихта алғаш рет турнирге 48 құрама қатысады. Бразилия құрамасы С тобында өнер көрсетеді. Команда алғашқы матчын 13 маусым күні Мароккомен өткізеді. Кейін 19 маусымда Гаитимен, ал 24 маусымда Шотландиямен кездеседі.

Неймар Бразилия құрамасы сапындағы соңғы матчын 2023 жылдың 18 қазанында Уругвайға қарсы әлем чемпионатының іріктеу кезеңінде өткізген болатын. Сол кездесуде бразилиялықтар 0:2 есебімен жеңіліп, футболшы сол жақ тізесіндегі алдыңғы айқас байламы мен менискін ауыр жарақаттап алған еді.

Осыдан кейін шабуылшы екі жарым жылдан астам уақыт бойы алаңнан тыс қалып, қалпына келу кезеңінен өтті. Соған қарамастан, Бразилия құрамасының бапкерлер штабы тәжірибелі ойыншыға сенім артуды жөн көрді.

Біздің серіктес: Olimpbet қосымшасын пайдалан