Луис Энрике болашағы үшін маңызды шешім қабылдады

«Париж Сен-Жермен» клубының бас бапкері Луис Энрике командамен жаңа ұзақ мерзімді келісімге қол қояды, деп хабарлайды Sport12.kz.

Инсайдер Бен Джейкобстың мәліметінше, француз клубы мен испаниялық маман төрт жылдық жаңа келісімшарт бойынша келісімге келген.

Тараптар Чемпиондар лигасының финалына дейін-ақ мәмілеге келгенімен, ресми хабарламаны маусым аяқталғанға дейін жарияламауға келіскен.

Будапешттегі жеңістен кейін «Париж Сен-Жерменнің» президенті Нассер әл-Хелаифи Луис Энрикенің Парижде өзін өте жайлы сезінетінін және толықтай команданы дамытуға ден қойғанын айтты. Клуб басшылығы испаниялық бапкерге толық сенім артып отыр.

Еске салайық, 30 мамыр күні «Париж Сен-Жермен» Чемпиондар лигасының финалында Лондонның «Арсеналын» пенальти сериясында жеңді. Негізгі уақытта матч 1:1 есебімен аяқталып, пенальтиде париждік клуб 4:3 есебімен басым түсті. Осылайша «Париж Сен-Жермен» қатарынан екінші рет Чемпиондар лигасының жеңімпазы атанды.

Біздің серіктес: Sport12kz