Жасұлан Әмірге қай клубтардың қызығып жатқаны белгілі болды

«Ордабасы» футбол клубының президенті Дархан Қызайбаев команданың шабуылшысы Жасұлан Әмірге Ресейдің «Балтикасы» мен Түркияның «Истанбул Башакшехир» клубтарынан трансферлік ұсыныс түскенін айтты, деп хабарлайды Sport12.kz.

Қызайбаевтың сөзінше, әзірге Жасұлан Әмірдің өзі де, клуб басшылығы да бұл ұсыныстарды тиімді деп санамайды.

— Әмірге қатысты жағдай қалай? Жанкүйерлер оның шетелге кететінін жиі айтып жүр.

— Егер Жасұланға шетелден шынымен тиімді ұсыныс түссе, біз оны міндетті түрде қарастырамыз.

— Ондай ұсыныс әлі болған жоқ па?

— Біздің және Жасұланның пікірінше, әзірге көңілден шығатын ұсыныс болған жоқ. Бірақ лайықты ұсыныс түссе, оны Әмірдің әкесімен, Жасұланның өзімен және клуб басшылығымен бірге талқылаймыз.

— Қандай клубтар қызығушылық танытты?

— Бізге белгілісі — Ресейдің «Балтикасы» мен Түркияның «Истанбул Башакшехирі». Басқа клубтар туралы әзірге айтуға ерте. Әртүрлі әңгімелер бар. Бірақ нақты айта алатыным — осы екі клуб.

Қызайбаевтың айтуынша, клубтың басты мақсаты — Жасұлан Әмірдің биыл «Ордабасымен» бірге Қазақстан чемпионы атануы.

«Ең алдымен, Жасұлан биыл командамен бірге чемпион болуы керек. Барлығымыздың мақсатымыз — чемпиондық. Ол чемпиондық құрамның бір бөлігі болуы тиіс. Ал келесі жылы өзімен және әкесімен бірге болашағына қатысты ортақ шешім қабылдаймыз. Егер «Ордабасы» Чемпиондар лигасына жолдама алса, оның клубпен бірге еурокубоктарда өнер көрсете ме, әлде басқа жолды таңдай ма — соны бірлесіп шешеміз», — деді клуб президенті.

Айта кетейік, 19 жастағы Жасұлан Әмір — «Ордабасының» түлегі. Ол Қазақстан Премьер-лигасындағы дебютін 2025 жылдың 30 наурызында «Қызылжарға» қарсы матчта өткізіп, 81-минутта алаңға шыққан.

Биылғы маусымда Әмір команданың негізгі ойыншыларының біріне айналып, Қазақстан Премьер-лигасында 17 матчқа қатысып, 7 гол соғып, 4 нәтижелі пас берді.

Қазақстан ұлттық құрамасындағы дебютін ол 2026 жылдың 6 маусымында Арменияға қарсы жолдастық кездесуде (1:1) өткізді.

Біздің серіктес: Olimpbet қосымшасын пайдалан