Нұралы Әліп Ресей Суперкубогын жеңіп алды

Санкт-Петербургтің «Зениті» Ресей Суперкубогы үшін өткен матчта Мәскеудің «Спартак» клубымен кездесті, деп хабарлайды Sport12.kz.

Нижний Новгородтағы «Совкомбанк Арена» стадионында өткен кездесу пенальти сериясында санкт-петербургтік команданың жеңісімен аяқталды.

Матчтың 25-минутында Кристофер Мартинс гол соғып, «Спартакты» алға шығарды. Мәскеулік команда негізгі уақыттың соңына дейін басымдықты сақтап тұрды. Алайда төреші қосқан уақыттың 98-минутында Александр Соболев пенальтиді сәтті орындап, есепті теңестірді — 1:1.

Жеңімпаз матчтан кейінгі пенальти сериясында анықталды. Бұл сында «Зенит» футболшылары дәлірек болып, 4:2 есебімен жеңіске жетті. Осылайша, Санкт-Петербург клубы Ресей Суперкубогын жеңіп алды.

Қазақстан ұлттық құрамасының капитаны Нұралы Әліп «Зениттің» негізгі құрамына енбей, қосалқы құрамда қалды.

Ресей Премьер-лигасының жаңа маусымындағы алғашқы турда «Зенит» 25 шілде күні сырт алаңда Тольяттидің «Акрон» клубымен кездеседі.

Біздің серіктес: Olimpbet қосымшасын пайдалан