4 сағат бұрын
Дастан Сәтпаев үшін «Челсиде» бәсеке күшейді
Фото:Chelsea
«Челси» шабуыл шебін тәжірибелі футболшымен толықтырды. Лондондық клуб 35 жастағы Дэнни Уэлбекті ресми түрде таныстырды. Ағылшын шабуылшысы жаңа командасымен 2028 жылдың жазына дейін келісімшарт жасасты.
Уэлбектің келуі Дастан Сәтпаевтың «Челсидегі» мүмкіндігіне де әсер етуі ықтимал. Қазір Хаби Алонсо орталық шабуылшы ретінде Дастан Сәтпаевтан бөлек жеті футболшыны қарастырып отыр. Олардың қатарында Жоао Педро, Николас Джексон, Лиам Делап, Дэнни Уэлбек, Эммануэль Эмегха, Марк Гиу және Давид Датро Фофана бар.
Уэлбек орталық шабуылшы ретінде ойнайды. Дастан Сәтпаев та осы позицияда өнер көрсетеді. Сондықтан тәжірибелі ағылшын футболшысының қосылуы қазақстандық шабуылшы үшін бәсекені күшейте түседі.
Дастан Сәтпаев маусым алдындағы соңғы екі жолдастық матчта алаңға шықты. «Вестерн Сидней Уондерерс» командасымен болған ойында қазақстандық футболшы гол соқты. Ал «Тоттенхэмге» қарсы ойында ол 70-минутта ойынға қосылды. Алайда бұл жолы нәтижелі әрекетімен көзге түсе алмады.
Қазақстандық футболшының командада қалуына мүмкіндік беретін тағы бір нұсқа бар. Сәтпаев сол қанатта да ойнай алады. Сондықтан Хаби Алонсо оны шабуылдың осы бөлігінде сынап көруі мүмкін. Дегенмен бұл жерде де бәсеке жоғары. Қазір аталған позицияда Джейми Гиттенс пен Михаил Мудрик бар.
Сондықтан Сәтпаев үшін «Челсидің» негізгі құрамынан орын алу оңай болмайды. Дегенмен Уэлбектің келуі қазақстандық футболшының командадағы болашағына қатысты нақты шешім деген сөз емес. Маусым басталғанға дейін Хаби Алонсо Сәтпаевқа қай позицияда мүмкіндік беретінін және оның командадағы тағдырын анықтайды.
Біздің серіктес: Sport12kz
