Оралда жаңа футбол стадионы салынады

Орал қаласында 1200 көрермен сыятын футбол стадионы салынбақ. Бұл туралы Батыс Қазақстан облысы әкімінің орынбасары Мирас Мүлкәй Құрылысшылар күніне орай ұйымдастырылған шарада айтты.

Жаңа нысан «Ақжайық» шағынауданынан бой көтереді. Қазір жобаға қатысты құрылыс жұмыстарының басталу және аяқталу мерзімі белгісіз. Стадион құрылысына қанша қаражат бөлінетіні де әзірге айтылған жоқ.

Оралдағы қолданыстағы негізгі футбол аренасы – Петр Атоян атындағы стадион. 1927 жылы ашылған нысан 8320 адамға арналған. Ол Қазақстандағы ең көне әрі әлі күнге дейін пайдаланылып келе жатқан стадиондардың бірі.

Бұған дейін арена «Ақжайық» футбол клубының үй алаңы ретінде қызмет етті. Клубтың жұмысы тоқтаған соң стадионда оның ізін жалғастырған «Жайық» командасы ойындарын өткізіп жүр.

Жаңа стадионның салынуы қаладағы футбол инфрақұрылымын кеңейтіп, жергілікті командалардың жаттығуы мен жарыстар ұйымдастыруына қосымша мүмкіндік бермек.

Біздің серіктес: Sport12kz