«Елімай» «Ертісті» өз алаңында айқын басымдықпен жеңді

Қазақстан Премьер-лигасының 21-туры аясында Семейдің «Елімайы» өз алаңында Павлодардың «Ертісін» қабылдап, 3:1 есебімен жеңді.

«Спартак» стадионында өткен матчта алаң иелері басымдық танытты. Дегенмен бірінші таймда есеп ашылған жоқ.

Екінші таймның 73-минутында Иван Свиридов баспен соққы жасап, «Елімайды» алға шығарды. Алайда төрт минуттан кейін Май Миттендорфер допты өз қақпасына бағыттап алды.

Ал 80-минутта Акмаль Бахтияров семейлік клубты қайтадан алға шығарса, араға екі минут салып «Ертістің» қорғаушысы Мбодж алаңнан қуылды. Павлодарлықтар матчтың қалған бөлігін он ойыншымен өткізуге мәжбүр болды.

Қосымша уақытта Мирас Оматай қарсылас қақпасына үшінші голды соғып, «Елімай» 3:1 есебімен жеңіске жетті.

Осы нәтижеден кейін «Елімай» 31 ұпай жинап, турнир кестесінде 6-орынға жайғасты. «Ертіс» болса 17 ұпаймен қауіпті аймаққа түсіп қалды.

Біздің серіктес: Sport12kz