«Астана» легионері «Оқжетпеске» қарсы жеңістің маңызын айтты

«Астана» шабуылшысы Никола Бурич Қазақстан Премьер-лигасының 21-туры аясында «Оқжетпеске» қарсы өткен матчтан кейін пікір білдіріп, жеңістің команда үшін маңыздылығын атап өтті.

Көкшетауда өткен кездесуде елордалық клуб 2:1 есебімен жеңіске жетті. Алғашқы болып алаң иелері есеп ашты. Бұрыштамадан кейін Борис Лотоцкий баспен дәл соққы жасап, «Оқжетпесті» алға шығарды.

Алайда «Астана» таразы басын өз пайдасына аудара алды. Алдымен Карло Бартолец есепті теңестірсе, кейін Марин Томасов елордалық клубқа жеңіс сыйлаған голды соқты. Бұл Томасовтың «Астана» сапындағы 101-голы болды.

Кездесуден кейін Никола Бурич команда үшін үш ұпайдың аса маңызды болғанын айтты. Оның сөзінше, «Астана» матч тағдырын ертерек шешуге мүмкіндік алған.

«Бұл біз үшін өте маңызды ойын болды. Бізге үш ұпай ауадай қажет еді. Матчтың тағдырын ертерек шешуге мүмкіндік беретін бірнеше сәтіміз болды. Егер сол мүмкіндіктерді пайдаланғанда, ойынның соңғы минуттарында тәуекелге бармас едік. Қарсылас есепті теңестіріп кетуі мүмкін еді. Дегенмен, ең бастысы – қажетті үш ұпайды иелендік», – деді Бурич.

Бұл жеңістен кейін «Астана» 38 ұпай жинап, ҚПЛ турнирлік кестесінде үшінші орынға көтерілді. «Оқжетпес» 33 ұпаймен төртінші орында қалды.

Біздің серіктес: Sport12kz