Юсуп Шадиев Қазақстан құрамасына шетелдік бапкер тағайындалуын сынға алды

Қазақстан футболының ардагері Юсуп Шадиев ұлттық құраманың бас бапкері қызметіне нидерландтық маман Джон ван ’т Схиптің тағайындалуына қатысты пікір білдірді.

Шадиев Қазақстан құрамасын шетелдік емес, отандық маман басқаруы керек деп есептейтінін айтты. Ол бұған дейін ұлттық құраманы жаттықтырған Талғат Байсуфиновтың жұмысына да оң баға берді.

«Мен бұл туралы мың рет айттым — Қазақстан құрамасына шетелдік бапкер не үшін керек? Бізде Талғат Байсуфинов сияқты жергілікті маман болды. Ол өз жұмысын қалыпты атқарды, нәтижелері де болды. Оны не үшін қызметтен алу керек еді? Оның орнына басқа қазақстандық бапкерді тағайындауға болатын еді», – деді Шадиев.

Футбол ардагерінің айтуынша, Қазақстанда білікті жаттықтырушылар жеткілікті, ал негізгі мәселе — жоғары деңгейдегі футболшылардың аздығында.

Шадиев сондай-ақ елдегі футболға деген көзқарасқа қатысты сын айтты.

«Шетелдік маман келеді, ақша табады да кетеді. Ал қазақстандық футбол сол орнында қалады», – деді ол.

Еске салайық, Джон ван ’т Схип бұған дейін «Аякс», «Твенте», «Зволле», мексикалық «Гвадалахара» және австралиялық «Мельбурн Сити» клубтарын жаттықтырған. Сонымен қатар ол Грекия және Армения ұлттық құрамаларын басқарған.

Біздің серіктес: Sport12kz