«Қайрат» бас бапкері «Левскиден» жеңілгеннен кейін пікір білдірді

Алматының «Қайрат» клубының бас бапкері Рафаэль Уразбахтин Чемпиондар лигасының үшінші іріктеу кезеңіндегі «Левскиге» қарсы қарымта матчтан кейін ойынға баға берді.

«Қайрат» Түркістанда өткен кездесуде болгариялық клубтан 0:1 есебімен жеңілді. Осылайша, екі матчтың қорытындысы бойынша «Левски» келесі кезеңге өтті.

Уразбахтин ең алдымен командаға қолдау көрсеткен жанкүйерлерге алғысын білдірді.

— Бізді қолдауға келген жанкүйерлерге алғыс айтқым келеді. Олар керемет атмосфера қалыптастырды. Өкінішке қарай, оларды жеңіспен қуанта алмадық. Әрине, көңіліміз қалды. Бірақ тырыстық. Қақпаға жасаған соққыларымызды ескерсек, кем дегенде бір гол соғуға лайық болдық деп ойлаймын. Өкінішке қарай, нәтиже болмады, — деді бапкер.

Сонымен қатар маман команданың алда маңызды кездесулері бар екенін атап өтті.

— Біз мұнымен тоқтап қалмаймыз. Алда чемпионаттағы және еурокубоктардағы өте маңызды матчтар бар. Енді Лига Еуропасының негізгі кезеңіне шығу үшін күресеміз. Әрине, уайымдадық, бірақ алға жылжуымыз керек. Мұндай ойындар бізге тәжірибе береді және ол болашақта көмектеседі деп үміттенемін, — деді Уразбахтин.

«Левски» Чемпиондар лигасының плей-офф кезеңінде афиналық АЕК-пен кездеседі.

Ал «Қайрат» еурокубоктағы жолын Лига Еуропасында жалғастырады. Алматы клубының келесі қарсыласы «Андерлехт» — ПАОК жұбының жеңімпазы болады.

Біздің серіктес: Sport12kz