Джон ван ’т Схип Қазақстан құрамасындағы басты мақсатын атады

Қазақстан құрамасының жаңа бас бапкері Джон ван ’т Схип ұлттық құрамаға ойыншыларды іріктеу талаптары мен алдағы Ұлттар лигасындағы мақсаттары туралы айтты.

Нидерландтық маман Қазақстан футболын жан-жақты зерттеп жатқанын жеткізді. Ол Премьер-лига матчтарын тамашалап, жаттықтырушылар штабымен және Қазақстан футбол федерациясының қызметкерлерімен кеңесіп, футболшылардың ойындарын бейнематериалдар арқылы талдап жүр.

Ван ’т Схиптің айтуынша, құрамаға шақырылатын ойыншы ең алдымен ұлттық команда деңгейінде өнер көрсетуге қажетті қасиеттерге ие болуы керек. Сонымен қатар маман бұған дейін құрамада ойнаған футболшыларды бақылауда ұстап, жаңа есімдерге де мүмкіндік беруге дайын.

— Құрама есігі барлығына ашық. Кез келген футболшы өз ойынымен шақыртуға лайық екенін дәлелдей алады, — деді бас бапкер.

Маман ойыншылардың физикалық дайындығына да ерекше мән беретінін атап өтті. Алдағы уақытта Қазақстан құрамасы қысқа мерзім ішінде төрт матч өткізуі тиіс. Осыған байланысты футболшылардың толық 90 минутқа немесе кездесудің белгілі бір бөлігінде жоғары деңгейде ойнауға дайын болуы маңызды.

Сонымен бірге ван ’т Схип әр позицияда кемінде екі футболшы болғанын қалайды.

Бас бапкер Қазақстан чемпионатының бірнеше матчын тамашалап үлгерді. Ол «Жетісу» — «Ордабасы», «Астана» — «Оқжетпес» және «Қайрат» — «Левски» кездесулерін стадионнан көрген. Алдағы уақытта «Тобыл» — «Партизан» және «Каспий» — «Елімай» матчтарына баруды жоспарлап отыр.

Ұлттық құраманың алдағы басты мақсаты — Ұлттар лигасында мүмкіндігінше жоғары нәтиже көрсету.

— Біздің басты міндетіміз — Ұлттар лигасында жақсы өнер көрсету, сапалы футбол ойнау және ұпай жинау. Біз турнир кестесінде мүмкіндігінше жоғары орынға көтерілгіміз келеді. Әрқашан ең жоғары нәтижеге, яғни бірінші орынға ұмтылуымыз керек. Бұл мақсатқа жете аламыз ба, оны матчтар көрсетеді. Бірақ біз өз командамызға сенеміз және осы мақсат үшін күресе алатынымызға сенімдіміз, — деді Джон ван ’т Схип.

Біздің серіктес: Sport12kz