«Ордабасы» қорғаушысы Румыния клубына ауысуы мүмкін

Шымкенттік «Ордабасы» клубының камерундық қорғаушысы Ги-Марселин Килама мансабын Румыния чемпионатында жалғастыруы мүмкін.

Орталық қорғаушыға Румынияның «Университатя Крайова» клубы қызығушылық танытып, футболшының трансфері бойынша келіссөздерді бастап кеткен. Қазіргі таңда тараптар мәміленің шарттарын талқылап жатыр. Келіссөздер оң бағытта өтіп жатқаны хабарланды.

Алайда румындық клуб Киламаны қатарға қосу үшін алдымен «Ордабасымен» келісімге келуі керек. Себебі футболшының шымкенттік командамен келісімшарты 2026 жылдың желтоқсанына дейін жарамды.

Киламаның қазіргі нарықтағы құны шамамен 1 миллион еуро деп бағаланып отыр.

Камерундық қорғаушы «Хатайспордан» кеткеннен кейін «Ордабасыға» қосылып, команданың негізгі құрамындағы маңызды ойыншылардың біріне айналды. Осы маусымда ол барлық турнирде 24 матч өткізіп, 3 гол соғып, 1 нәтижелі пас берген.

Қазақстан Премьер-лигасының 21 турында «Ордабасы» 49 ұпаймен турнир кестесінде бірінші орында келеді.

Біздің серіктес: Sport12kz