EA SPORTS FC 26: Данияр Шарабадин Қазақстан чемпионы атанды

Астанадағы Қазақстан ұлттық спорт университетінде EA SPORTS FC 26 ойынынан киберспорт бойынша Қазақстан чемпионатының LAN форматындағы финалдық кезеңі өтті.

Жарыстың шешуші кезеңінде елдің үздік сегіз ойыншысы чемпиондық атақты сарапқа салды. Қатысушылар Ultimate Team FC Pro режиміндегі плей-офф кезеңінде бақ сынады.

Нәтижесінде Данияр «dan1k» Шарабадин барлық қарсыласынан басым түсіп, Қазақстан чемпионы атанды. Абылай «Abyl_Qazaqstan» Жанаберген екінші орын алса, Алишер «alish_back» Муканали үздік үштікті түйіндеді.

Қазақстан чемпионы атанған Данияр Шарабадин ел намысын UEFA eEURO 2026 халықаралық кезеңінде қорғау құқығына ие болды.

«Турнирді жоғары деңгейде ұйымдастырған Қазақстан футбол федерациясына алғыс айтамын. Бұған дейін жарыс онлайн форматта өтетін. Биыл LAN форматында ұйымдастырылып, мен үшін үлкен тәжірибе болды. Бұл додада өз деңгейімді көрсетуге мүмкіндік алдым.

Биыл ресми турнирде екінші рет жүлдеге ие болдым. Бұл тек бастамасы деп ойлаймын. Келесі маусымда бұдан да жоғары нәтижелерге қол жеткізгім келеді», – деді Данияр Шарабадин.

Киберспортшы алдағы қараша айында өтеді деп жоспарланған Еуропа чемпионатының іріктеу кезеңіне қатысуды көздеп отыр.

«Егер бәрі сәтті болса, қарашада Еуропа чемпионатына іріктеу кезеңі өтеді. Сол бәсекеге қатысып, Еуропа чемпионатында өнер көрсеткім келеді. Оған дейін тыңғылықты дайындалып, деңгейімді одан әрі көтеруге тырысамын. Қазақстанды Еурода лайықты таныстырғым келеді», – деді ол.

Айтв кетейік, UEFA eEURO 2026 турнирінің онлайн топтық кезеңі 17-18 қазанда өтеді. Оған УЕФА-ға мүше 47 ұлттық қауымдастықтың өкілдері қатысады.

Топтық кезең қорытындысы бойынша үздік сегіз ойыншы 12 желтоқсанда Лондонда өтетін eEURO 2026 финалдық кезеңіне жолдама алады.

Біздің серіктес: Sport12kz