«Арсенал» мен «Манчестер Сити» ПСЖ қорғаушысына көз тікті

Англиялық «Арсенал» мен «Манчестер Сити» француздық ПСЖ клубының орталық қорғаушысы Виллиан Пачоға қызығушылық танытып отыр, деп хабарлайды Sport12.kz.

Ақпаратқа сәйкес, қос клуб та Эквадор құрамасының 24 жастағы қорғаушысы туралы егжей-тегжейлі есеп дайындаған. Сондай-ақ олардың өкілдері Пачоны Франция чемпионатындағы «Лилльге» қарсы матчта бақылаған. Кездесу 2:2 есебімен аяқталған.

Пачо жылдамдығымен, физикалық дайындығымен, доппен сенімді ойнауымен және шабуылды тереңнен бастау қабілетімен ағылшын клубтарының назарын аударған. «Арсенал» эквадорлық футболшыны сол аяғымен ойнайтын жоғары деңгейлі қорғаушы ретінде қарастырып отыр. Ал «Манчестер Сити» оның пас беру шеберлігі мен қорғанысқа жылдам оралу қабілетін жоғары бағалайды.

Бұған дейін Пачоға «Ливерпуль» мен мадридтік «Реал» да қызығушылық танытқан. Алайда әзірге әлеуетті сатып алушылардың ешқайсысы ПСЖ-мен ресми келіссөз жүргізіп жатқан жоқ.

Қорғаушының париждік клубпен келісімшарты 2031 жылға дейін жарамды. Сонымен қатар Пачо Луис Энрике командасының негізгі ойыншыларының бірі саналады. Ол осы маусымдағы Лига 1-дің алғашқы үш кездесуін де толық өткізді.

Сондықтан «ПСЖ» футболшыны жіберуге тек өте тиімді ұсыныс түскен жағдайда ғана келісуі мүмкін. Ал Пачоның өзі де клубтан кетуге ниет білдіруі қажет. Осыған байланысты «Арсенал» мен «Манчестер Сити» қаңтардағы трансферлік кезеңде әзірге қорғаушыны бақылауды жалғастыруы ықтимал.

Біздің серіктес: Sport12kz