«Шахтер» 18 жастағы шабуылшы үшін 50 млн теңге ұсынды

Қарағандылық «Шахтер» шымкенттік «Оңтүстік академиясының» шабуылшысы Әлихан Әлиді өз құрамына қосуға қызығушылық танытқан.

AmanVIBE мәліметінше, қарағандылық клуб 18 жастағы футболшының трансфері үшін 50 миллион теңге төлеуге дайын болған. Алайда «Оңтүстік академиясы» бұл ұсынысты қабылдамай, жас ойыншыны командада қалдыру туралы шешім шығарған.

Шымкенттік клуб Әлихан Әлидің болашақта шеберлігін одан әрі жетілдіріп, трансферлік құнының өсуіне мүмкіндік бар деп санайды. Осыған байланысты команда басшылығы футболшымен әзірге қоштасуға ниетті емес.

Әлихан Әли биыл Қазақстан Бірінші лигасында жоғары нәтижесімен көзге түсіп жүр. 18 жастағы шабуылшы осы маусымда 19 матч өткізіп, 13 гол соққан.

Осы көрсеткіштің арқасында ол чемпионаттың үздік сұрмергендері қатарынан көрінді. Сонымен қатар Әлихан Қазақстан жастар құрамасына шақырылды.

Айта кетейік, келесі маусымда «Шахтер» Қазақстан Премьер-лигасында өнер көрсетеді.

Біздің серіктес: Sport12kz